Turmush: Терезе аркылуу кирип келген: Таласта түндө жасалган кылмыш

Turmush — Талас районунда каракчылыкка шектелген адам кармалды. Бул тууралуу бүгүн, 5-апрелде Талас ОИИБдин басма сөз кызматы кабарлады.

Маалыматка караганда, 28-март күнү Талас районунун Калба айыл өкмөтүнө караштуу таштанды таштоочу жерде иштеп, жашаган К.Д. жана С.А. аттуу 2 адам милицияга кайрылган. Алар ошол күнү таңга маал 35-40 жаштар чамасындагы бейтааныш адам алар уктап жаткан бөлмөнүн терезеси аркылуу кирип, колундагы бычагы менен коркутуп, уюлдук телефондорун алып кеткендигин билдирген. Бул факт боюнча Кылмыш-жаза кодексинин 207-беренеси (каракчылык) менен кылмыш иш козголгон.

Талас РИИБдин кызматкерлери тарабынан иликтөө иш-чаралары жүргүзүлүп, кылмышка шектүү Манас районунун Көк-Дөбө айылынын 41 жаштагы тургуну Д. Р. экени жана кылмыш учурунда мас абалда болгону аныкталган. Ал 3 күн ичинде кармалды. Учурда соттун чечими менен убактылуу кармоочу жайга киргизилип, тергөө амалдары жүрүп жатат.