Turmush: Таластагы кашарда өлтүрүлгөн адамдар: Кылмыштын чоо-жайы аныкталды

Turmush — Талас облусунда адам өлтүрүү фактысынын бети ачылды. Бул тууралуу бүгүн, 10-ноябрда Талас ОИИБден кабарлашты.

Маалыматка караганда, милицияга 9-ноябрь күнү Бакай-Ата районунун 1963-жылы туулган тургуну А.Т. саат 07:00 чамасында Кең-Арал айылына караштуу Коргон-Таш жайлоосуна кеткен бойдон дайынсыз жок болуп жаткандыгы тууралуу маалымат келип түшкөн. Аталган адамды издөө иштери жүргүзүлүп, бүгүн, 10-ноябрь күнү таңкы саат 07:00 чамасында Талас районунун Нылды өзөнүндө «Тойота Камри» үлгүсүндөгү унаанын ичинен 2 адамдын киши колдуу болуп өлтүрүлгөн жансыз денелери табылган. Алар Бакай-Ата районунун 1963-жылы туулган тургуну А.Т. менен 1964-жылы туулган Т.М. экендиги аныкталган. Бул факты Кылмыш-жаза кодексинин 122-беренеси (киши өлтүрүү) менен катталып, кылмыш иш козголгон.

Кылмышка шектүү катары каза болгон А.Т.нын малчысы, Талас районунун 1982-жылы туулган тургуну С.С. кармалды. Тергөөнүн жүрүшүндө малчы С.С. менен А.Т.нын ортосунда карызга байланыштуу пикир келишпестик чыгып, анын кесепетинен адам өмүрү кыйылгандыгы такталды.

Окуя тууралуу:

Буга чейин Таласта 60 жаштагы 2 адамдын сөөгү табылганы кабарланган.

Маалыматка караганда, маркум М.К. менен Т.А. классташтар болушкан. Экөө кечээ, 9-ноябрда таңга маал Нылды өрөөнүнө мал алып келгени кетип, дайынсыз болушканы айтылган.