Turmush — Чүй облусунун Токмок шаарында, Бишкек—Нарын—Торугарт унаа жолунда 9-класстын бүтүрүүчүлөрү унаа башкарып, жол эрежесин бузушканын аймактык кабарчыга күбөлөр билдирди.

Окуя кечээ, 25-май күнү болгон.

Чүй ОИИББ боюнча ЖКККБнын басма сөз кызматынын маалыматына караганда, 25-майда Бишкек—Нарын—Торугарт унаа жолунда Токмок шаарынын №9 орто мектебинин окуучулары унаа башкарып жүргөндүгү тууралуу маалымат тарап, социалдык тармактарга видеолор жарыяланган.

Токмок ШИИБ боюнча жол кыймылынын коопсуздугун камсыздоо бөлүмчөсүнүн кызматкерлери тарабынан видеого түшүп калган унаалардын айдоочулары 23-24 жаштагы жарандар экендиги аныкталган. Текшерүү учурунда алардын айдоочулук күбөлүктөрү болгон.

Ал эми жүргүнчүлөр Токмок шаарынын №9 мектебинин окуучулары экени такталды. Азыркы учурда жаш өспүрүмдөрдүн ата-энелери Токмок ШИИБдин тергөө кызматына чакыртылды.

Ал эми унаалардын айдоочуларына Укук бузуулар жөнүндө кодексинин 189-беренесине (автоээнбаштык) ылайык 15000 сомдон айып пул салынып, унаалары айып короого токтотулду.

Учурда калган унаалардын айдоочулары изделүүдө.