Turmush — Чүй облусунун Сокулук районуна караштуу Белек айылындагы ат майданында ат оюндары өттү. Бул тууралуу аймактык кабарчы билдирди.

Тай чабышка 10 тай, кунан чабышка 12 кунан, аламан жарышка 9 күлүк катышты.

Жыйынтыгында тай чабыш боюнча (3 чакырым) 1-орунга Шалта айылынан келген «Сулуу тору», 2-орунга Күн-Туу айылынан келген «Айтору», 3-орунга Шалта айылынан келген «Күрөӊ кашка» күлүк келди.

Ал эми кунан чабышта (8 чакырым) 1-орунга «Адыш» ат майданынан келген «Ках», 2-орунга «Гүлсары», 3-орунду «Акжол» ат майданынан келген «Козу күрөӊ» кунаны келди.

Аламан жарышта 1-орунга Кара-Балта шаарынан келген «Карагат», 2-орунга Асылбаш айылынан келген «Байрак», 3-орунга Төш-Булак айылынан келген «Дора» аттуу күлүк келди.

Күлүк ээлери акчалай сыйлык, диплом менен сыйланышты.

Ошондой эле, көк бөрү оюнунун финалдык бөлүгү уюштурулуп, анда 1-орунду Военно-Антоновка айылдык командасы, 2-орунду Биринчи май айылдык командасы, 3-орунду Кызыл-Туу айылдык командасы утуп алышты.