Turmush — Кара-Балта шаарында кара курттар пайда болду. Бул тууралуу жергиликтүү тургундар билдирди.

«Токтогул көчөсүн бойлой жайгашкан жеке сектордун жанындагы участокторун көрктөндүрүү жана оңдоо иштерин жүргүздүк. Участоктон да, үйдөн да жөргөмүштөрдүн уясын — кара курттарды таптык. Буга чейин кара курттарды талаадан кезиктиргем. Ошондуктан алардын сырткы көрүнүшүн жакшы билем. Үй сатыкка коюлган, анда эч ким жашабайт, ошондуктан бул жерде кооптуу “ижарачылар” пайда болгон», — дейт шаар тургуну Николай Попков.

«Кыргызстанда уулуу жөргөмүштөрдүн эки түрү бар: кара курт жана түштүк орус тарантуласы. Кара курттардын эң сүйүктүү жери — талаалар, кургак чөлдөр, эрмен баскан тоо этектери. Алар таштардын астында, чөптөрдүн тамырында, курулуш таштандыларында кездешет. Кара курттун бойго жеткен ургаачыларында кызыл жана ак тактар бар, узундугу 2 сантиметрге жетет. Эркектери алда канча кичирээк жана түсү ачык келет. Июль айында ургаачылары уя салып, 700гө чейин жумуртка таштайт. 5-7 күндөн кийин жумурткадан жөргөмүш чыгат. Жазында алар сыртка чыгып, өз алдынча жашоо башташат», — дейт эколог Александр Сосновский.

Кара курттар адамдар жана жаныбарлар үчүн коркунучтуу. Алар адатта коргонуу үчүн чагып алышат. Чагуулар көбүнчө июндан августка чейин болот.