Turmush — Ден соолукту жана ынтымактыкты чыңдоо максатында өткөн Чүй облусунун Панфилов районундагы спорттук беттешүүдө кайыңдылык жаш спортчулар байгелүү орундарды багындырышты. Бул тууралуу шаардык мэриядан билдирди.

Маалым болгондой, иш-чара Курама айыл аймагында өткөн.

«Шаарыбызда 3 жалпы билим берүү орто мектеп бар. Жаш спортчуларыбыз райондук ар түрдүү спорттук иш-чараларда байгелүү орундарды багынтып келет. Жайкы каникул алдындагы жыйынтыктоочу футболдук беттешүүдө К.Сулайманова атындагы №2 Кайыңды мектеп-гимназиясы 1-орунду, ал эми В.В.Казаченко атындагы №1 Кайыңды 1 мектеп-гимназиясынын жаш футболчулары 2-орунду багындырды. Ошентип, шаардагы 2 мектебибиз байгелүү болушту», — деп билдиришти мэриядан.

Ал эми райондук билим берүү бөлүмүнүн усулчусу Эленора Насирова 3-орунга Вознесеновка жалпы билим берүү орто мектеби жетишкенин жана бардык жеңүүлөр ардак грамота, кызыктыруучу сыйлыктар менен сыйланганын кошумчалады.