Turmush — Ош облусунун Өзгөн районундагы жол-транспорт кырсыгынан эркек киши каза болду.

Turmush басылмасына булактар аркылуу маалым болгондой, окуя 2024-жылдын 7-июнунда катталган. Маркум Өзгөн районунун мурунку акими Болот Дыйканбаевдин тууганы болчу.

• Дыйканбаев Болот Жусупович 2020-жылдын 19-августунда Өзгөн районунун акими болуп дайындалган. Ал эми 2020-жылдын октябрь айында аталган кызматтан бошотулган.

Ош облустук жол кыймылынын коопсуздугун камсыздоо бөлүмү тастыктаган маалымат боюнча, кырсык 7-июнь күнү саат 16:00 чамасында Өзгөн районунун Жээренчи—Эркин-Тоо унаа жолунун 4-чакырымында, тактап атканда Жазы айыл аймагынын Кызыл-Дыйкан айылында болгон. Кызыл-Тоо айылынын 1991-жылы туулган тургуну М.Ч. «Хендай Портер» үлгүсүндөгү автоунаасын батыштан чыгышты көздөй башкарып бара жатып, каршы тилкеде келе жаткан Өзгөн районунун Жазы айыл аймагынын Кызыл-Дыйкан айылынын 1986-жылы туулган тургуну Д.М.нын башкаруусундагы «Дэу Тико» унаасы менен кагышкан.

Кырсыктын кесепетинен «Дэу Тико» автоунаасынын айдоочусу Д.М. Өзгөн аймактык ооруканасына жетпей көз жумган. Ал эми «Хендай Портер» унаасынын жүргүнчүсү — Өзгөн районунун Кызыл-Тоо айылынын 1996-жылы туулган тургуну К.Н. жаракат алып, Өзгөн аймактык ооруканасына жаткырылган.