Turmush — Өзгөн районунун Төрт-Көл айыл аймагынын Ана-Кызыл айылында 63 жаштагы жаранды унаасы менен сүзүп кеткен айдоочу кармалды. Бул тууралуу Ош облустук жол кыймылынын коопсуздугун камсыздоо бөлүмүнөн билдиришти.

Маалыматка караганда, кечээ, 23-майда саат 04:50 чамасында Ана-Кызыл айылында 1961-жылы туулган М.Ч.ны унаа сүзүп, айдоочусу качып кеткен. Анын кесепетинен жабырлануучу жаракат алып, Өзгөн райондук ооруканасына жаткырылган.

Издөө иш-чараларынын натыйжасында Өзгөн РИИБдин жол кыймылынын коопсуздугун камсыздоо бөлүмүнүн инспекторлору тарабынан айдоочу — 1981-жылы туулган Н.А. шектүү катары кармалды. Ал Өзгөн районунун Чаңгет айылынын тургуну, бирок унаасын Кара-Дыйкан айылындагы үйгө бекитип койгон.

Унаа айып короого токтотулду.