Turmush — Кыргыз-өзбек мамлекеттик чек арасындагы «Бек-Абад—Ханабад» өткөрмө пунктунда өзбек тарап дубалын бузду. Бул тууралуу Сузак районуна караштуу Атабеков айыл аймагынын Бек-Абад айылынын жашоочулары билдирди.

Жергиликтүү тургундар эми коңшу Өзбекстан Республикасында жашаган туугандары менен каттоодо женилдик болорун айтышты.

«Жакын турган туугандарыбызга Оштогу «Достук» бекетине барып өтүп, айланып келчү элек. 2 чакырымдай жерде турган тууганыбыз менен учурашуу убайымы көп болчу. Бул пункттун ачылышын биз да, аркы тараптагы туугандар да чыдамсыздык менен күтүп жатабыз. 3-4 күн мурун өзбек тарап өздөрү курган дубалды бузушту. Азыр курулуш иши жүрүп жатканын байкоого болот. Эки өлкөнүн элине жакшы мүмкүнчүлүк болот», — деди алар.

Turmush 2022-жылдын ноябрь айынын аягында «Бек-Абад» көзөмөл-өткөрмө бекети оңдолуп жатканын жазган.

Сузак районунун Атабеков айыл аймагындагы «Бек-Абад» көзөмөл-өткөрмө бекети Өзбекстан Республикасы менен чектешкен аймакта жайгашкан. Бекетти оңдоп-түзөө үчүн мамлекеттен жалпы 3 миллион сом акча каражаты бөлүнүп берилген. Оңдоо иштерин декабрь айына чейин бүткөрүү пландалып жаткан.

Жалал-Абад облусунда кыргыз-өзбек чек аралары чектешкен жерде эки жөө жүргүнчүлөр өтүүчү пост иштеп жатат. Алар: Ноокен районундагы «Маданият» бекети менен Ала-Бука районундагы «Баймак» өткөрмө бекети.

Президент Садыр Жапаров «2022-жылдын 3-ноябрында Бишкек шаарында кол коюлган Кыргыз Республикасы менен Өзбекстан Республикасынын ортосундагы кыргыз-өзбек мамлекеттик чек арасынын айрым участоктору жөнүндө келишимди ратификациялоо тууралуу» мыйзамга кол койгонун кечээ, 29-ноябрда басма сөз кызматы кабарлаган.

Мыйзам Кыргыз Республикасынын Жогорку Кеңеши тарабынан 2022-жылдын 17-ноябрында кабыл алынган. Ал 2022-жылдын 3-ноябрында Бишкек шаарында кол коюлган кыргыз-өзбек мамлекеттик чек арасынын айрым участоктору жөнүндө келишимди ратификациялоону сунуштайт.

2022-жылдын 3-ноябрында Бишкек шаарында Кыргыз Республикасы менен Өзбекстан Республикасынын ортосундагы кыргыз-өзбек мамлекеттик чек арасынын айрым участоктору жөнүндө келишимге кол коюлуп, ага 302,29 км аралыктагы участоктор кирген.