Ошто «Тойотада» бара жаткан жубайлар жан берди. Каргашалуу кырсыктын чоо-жайы

Turmush — Кечээ, 21-июлда Ош—Ноокат унаа жолунда жол-транспорт кырсыгы катталып, 2 адам каза болуп, 3 адам ооруканага түштү.

Жергиликтүү тургундардын айтымында, кырсыктан Гүлистан айыл аймагынын тургундары — жубайлар каза тапты. Ооруканага түшкөндөр да бир үй-бүлөнүн мүчөлөрү.

Ош облустук жол кыймылынын коопсуздугун камсыздоо бөлүмү Turmush басылмасына тастыктаган маалымат боюнча, 21-июль күнү саат 17:20 чамасында Ош—Ноокат унаа жолунда, тактап айтканда Жапалак айылында 1996-жылы туулган М.М. «Хендай Портер» үлгүсүндөгү автоунаасын башкарып келе жатып, жолдун каршы тилкесинде келе жаткан 1954-жылы туулган Т.Ш.нын башкаруусундагы «Тойота Авенсис» үлгүсүндөгү унаа менен бет маңдай кагылышкан.

Кырсыктын кесепетинен «Тойота Авенсис» үлгүсүндөгү унаанын айдоочусу Ш.Т. жана жанындагы жубайы — 1977-жылы туулган К.А. окуя болгон жерде каза болду. Жүргүнчүлөр — 1984-жылы туулган Т.М., 1994-жылы туулган Т.Б., 2001-жылы туулган Т.М. денесинен жараат алып, тез жардам кызматы аркылуу ооруканага жеткирилген.