Ошто милиционерлердин унаасы «Тойота» менен кагышкан. 6 адам ооруканага түштү

Turmush — Ош облусунун Өзгөн райондук ички иштер бөлүмүнүн кызматкерлери кызматтык унаа менен жол кырсыкка кабылды. Бул тууралуу күбөлөр билдирди.

Алардын айтымында, окуя 9-июль күнү Кара-Суу районунун Мады айыл аймагына караштуу Асан-Чек айылында болгон.

Ал эми Ош облустук жол кыймылынын коопсуздугун камсыздоо бөлүмү Turmush басылмасына тастыктаган маалымат боюнча, кырсык 2024-жылдын 9-июлунда саат 10:30 чамасында Бишкек—Ош унаа жолунун 659-чакырымында, тактап айтканда Ош облусунун Кара-Суу районунун Мады айыл аймагынын Асан-Чек айылында катталган. Өзгөн районунун Мырза-Аке айыл аймагынын Адыр айылынын тургуну — 2000-жылы туулган О.уулу Т. Өзгөн РИИБге таандык болгон кызматтык «Газ-2752 Соболь» үлгүсүндөгү автоунаасы менен батыштан чыгышты көздөй башкарып бара жатып, карама-каршы тилкеге чыгып, өз жолунда келе жаткан «Тойота Ипсум» унаасы менен кагышкан. «Тойота» унаасын Кара-Суу районунун Жоош айыл аймагынын Мамажан айылынын тургуну — 1967-жылы туулган М.А.Ч. башкарып келе жаткан.

Кырсыктын кесепетинен «Тойота Ипсум» унаасынын жүргүнчүлөрү жабыркады.

Алар:

— Ош шаарынын 2009-жылы туулган тургуну А.Р. (кыз бала);

— Жалал-Абад облусунун Шамалды-Сай шаарынын 1994-жылы туулган тургуну Р.кызы А.;

— 2014-жылы туулган З.А. (Р.кызы А.нын кызы);

— 2022-жылы туулган З.А. (Р.кызы А.нын уулу);

— Кара-Суу районунун Папан айыл аймагынын Чычкан-Көл айылынын 1996-жылы туулган тургуну Р.кызы Г.;

— 2018-жылы туулган Ш.Р. (Р.кызы Г.нын кызы).

Алар Ош облустук ооруканасына кайрылышкан.