Ошто эки районду байланыштырган жолду сел алып кетти

Turmush — Кечээ, 8-июлда жааган жаандан улам Кара-Кулжа менен Алай райондорун байланыштырган жолдо сел жүрдү. Жолдун айрым тилкелерин сел алып кетти.

Өзгөчө кырдаалдар министрлигинин маалыматы боюнча, учурда жол бир тараптуу ачык. Кара-Кулжа районунун Сары-Булак айыл аймагында 8-июль күнү жааган жаандын кесепетинен кокту-колоттордон келген сел суулар Кызыл-Суу суусуна түшүп, суунун деңгээли көтөрүлгөн. Анын кесепетинен Кызыл-Булак айылында ички чарбалык унаа жолдун 100-150 метр аралыгын сел жеп кеткен.

«Унаа жол бир тараптуу ачык. Жерине айыл аймак тарабынан техника тартылды», — деп айтылат маалыматта.

————————————————

Буга чейин президенттин облустагы өкүлчүлүгүнүн басма сөз кызматы Алай районундагы сел каптаган унаа жол бир тараптуу ачылганын билдирген.

Алдын ала маалымат боюнча, 8-июлда саат 15:00 чамасында жааган жаандын кесепетинен кокту-колоттордон келген сел суулары Гүлчө айыл аймагынын Таш-Коро айылында жайгашкан Ош—Сары-Таш—Эркеч-Там унаа жолунун 70-71 чакырым аралыгын кум-шагылга толтурган.

Жерине маалыматты тактоо жана тазалоо иштерин жүргүзүүгө Алай райондук ӨКБдан ыкчам топ жана техникалар тартылган.

• Буга чейин Өзгөчө кырдаалдар министрлиги 8-июлда Ош жана Баткен облусунун аймактарында сел жүргөнүн билдирген.