Turmush — Ош шаарынын Жибек-Жолу аймактык башкармалыгындагы №177 жана Керме-Тоо муниципалдык аймактык башкармалыгындагы Чкалов көчөсүндө капиталдык оңдоп-түзөө иштери башталды. Бул тууралуу Ош шаардык капиталдык курулуш башкармалыгынын башчысы Шумкарбек Пайзиев билдирди.

Анын айтымында, аталган көчөлөрдөгү оңдоп-түздөө иштери жергиликтүү тургундардын кайрылууларына ылайык жүргүзүлүп, жергиликтүү жашоочулар тарабынан көмөк көрсөтүүлүдө.

№177 көчөсүндөгү жолдун узундугу 2,33 чакырымды, туурасы 9 метрди түзөт. Узундугу 1 чакырымды, туурасы 2,25 метрди түзгөн тротуары кошо курулат.

«Сапат курулуш ЛТД» ЖЧКсы тендерден 47 млн сомго уткан. Жумуштар 1,5 айда толугу менен бүтөт.

Бул участок боюнча тендер 2024-жылы апрелде өткөн. Тендердин суммасы 56 млн 201 миң 680 сом болгон. Ага катышкан компаниялар:

— «Чинизасайана» ЖЧКсы [Юстиция министрлигинин маалыматына караганда, жетекчиси Боронбаев Сайпидин Маматович, түзүүчүсү — Шакирова Айсулу Азимжановна] — 51 млн 453 миң 178 сом;

— «Сапат Курулуш ЛТД» ЖЧКсы [Юстиция министрлигинин маалыматына караганда, жетекчиси жана түзүүчүсү Абылов Амантур Эмилбекович] — 47 млн 998 миң 756 сом;

— «САД и МиТ» ЖЧКсы [Юстиция министрлигинин маалыматына караганда, жетекчиси жана түзүүчүсү Суранов Арналбек Алмазбекович];

— «РСУ ЮГ» ЖЧКсы [Юстиция министрлигинин маалыматына караганда, жетекчиси жана түзүүчүсү Умарали уулу Акжол];

— «Бай Строй» ЖЧКсы [Юстиция министрлигинин маалыматына караганда, жетекчиси жана түзүүчүсү Нуркамил уулу Талантбек] — 51 млн 75 миң 713 сом;

— «Амантур Строй Сервис» ЖЧК [Юстиция министрлигинин маалыматына караганда, жетекчиси Токтоназаров Чингиз Токтоназарович, түзүүчүсү Жутанов Давлес Мэлисович] — 50 млн 587 миң 379 сом.

Тендерден жеңүүчү болуп «Сапат Курулуш ЛТД» ЖЧКсы табылган.

Ал эми Чкалов көчөсүндө 850 метр жол толук оңдолуп, 2 көчөдө тең ирригациялык курулмалар, жарыктандыруу системалары орнотулат. Бул жердеги иштерди «Оомат» ЖЧКсы аткарууда. Иштер 15 күндө толугу менен бүткөрүлөт.