Turmush — Ноокат районунун Абшыр-Ата айылында сел алып кеткен Шаран-Сай көпүрөсү 1-июль күнү калыбына келтирилди. Бул тууралуу ӨКМден кабарлашты.

Маалыматка караганда, жол каттамын ачуу максатында ӨКМден 5 техника, заводдордун биринен 4 техника тартылган. Эртең менен саат 9:00дө башталган жумуш 13:00дө толугу менен бүткөрүлүп, унаалардын бардык түрү үчүн жол ачылды.

Ноокат районунун Көк-Жар–Абшыр-Ата унаа жолунун 8-чакырымындагы Шаран-Сай көпүрөсү селден улам жараксыз абалга келген. Натыйжада Кулатов жана Көк-Жар айыл аймактарынын ортосундагы жол каттамы үзгүлтүккө учураган.

Сел алып кеткен башка көпүрөнүн чоо-жайы:

• Кечээ, 30-июнда Ноокат районунун Көк-Жар айыл аймагындагы Найман көпүрөсүн сел алып кеткен. Анын кесепетинен Ош—Баткен—Раззаков унаа жолунда каттам токтогон.

Андан кийин түндө айланма жол аркылуу эки тараптуу каттам уюштурулганы белгилүү болгон.