Turmush — Ош облусунун Ноокат районундагы жол-транспорт кырсыгынан 1 адам каза болду. Бул тууралуу Turmush басылмасына жергиликтүү тургундар билдирди.

Алардын айтымында, кырсык кечээ, 1-июлда болгон. Ошондой эле унаада бар жаткан жүргүнчүлөр жабыркап, Ноокат райондук ооруканасына жеткирилген.

Ал эми Ош облустук жол кыймылынын коопсуздугун камсыздоо бөлүмү тастыктаган маалымат боюнча, 1-июль күнү саат 16:00 чамасында Ош—Баткен—Раззаков унаа жолунун 20-чакырымында Гулистан айыл аймагынын 2004-жылы туулган тургуну Я.З. «Дэу Нексия» үлгүсүндөгү унаасы менен түштүктөн чыгышты көздөй бара жатып, рулду башкара албай, карама-каршы багытта келе жаткан «Хендай Портер» унаасы менен кагышкан. Аталган унааны Гулистан айыл аймагынын 1979-жылы туулган тургуну А.И. башкарып бара жаткан.

Кырсыктын кесепетинен «Дэу Нексия» үлгүсүндөгү унаанын жүргүнчүсү, аталган айыл аймактын Бостон айылынын 2004-жылы туулган тургуну Т.П. окуя болгон жерде каза болгон. Ал эми айдоочусу 3.Я., жүргүнчүлөрү — 2008-жылы туулган Т.А., 2003-жылы туулган А.М., 2005-жылы туулган Ж.И. жана «Хендай Портер» автоунаасынын айдоочусу И.А., жүргүнчүсү — 2008-жылы туулган М.М. жаракат алып, Ноокат аймактык ооруканасына кайрылышкан.

Ноокат аймактык ооруканасынан билдиришкендей, жалпы 6 адам ооруканага түшкөн. Анын үчөө жандандыруу бөлүмүндө, үчөө травматология бөлүмүндө жатат. Жандандыруу бөлүмүндө жаткан бейтаптардын биринин абалы өтө оор деп бааланып, ал шок абалдан чыга элек.