Turmush — Нарын мамлекеттик жаратылыш коругундагы фотокапканга аюу, тоо теке жана карышкырлар түшүп калды. Бул тууралуу Нарын мамлекеттик жаратылыш коругунун директору Эркин Абдыбалиев билдирди.

Анын айтымында, 2016-жылдан бери фотокапкандар менен жапайы жаныбарларга мониторинг иштери жүргүзүлүп келет.

«Фотокапкандардын жардамы менен коруктун төмөн жагында жапайы эчки-теке жана илбирстин ареалы (таралуу аймагы) такталды. Жыл сайын көрсөтүлгөн аймактан жапайы жаныбарларга байкоо жүргүзүлүп келет», — деп айтылат маалыматта.

————

Нарын мамлекеттик коругу — 1983-жылы түзүлгөн.

Нарын мамлекеттик жаратылыш коругунун аймагы бүгүнкү күндө 105519 гектарды түзөт. Коруктун аймагында сүт эмүүчүлөрдүн 26 түрү, канаттуулардын 104, балыктардын 3, сойлоп жүрүүчүлөрдүн 4, жерде-сууда жашоочулардын 1 түрү кездешет.

Курт-кумурскалар бүгүнкү күндө толук изилденип бүтө элек. Корукта Кызыл китепке кирген төмөнкү сүт эмүүчүлөр бар: илбирс, мадыл, ,сүлөөсүн күрөн аюу, бугу, марал, кулжа, суусар.

Канаттуулардын төмөнкү түрлөрү кездешет: бүркүт, шумкар, көк жору, көкчулдук, кидик бүркүт, сары үкү, шахин, шумкар, мыкыйүкү, кадимки тартар тоок жана кумай. Корукта өсүмдүктөрдүн 600дөн ашык түрү бар.