Москва районунда касапкананын ээси менен журналисттер бири-биринин үстүнөн арыз жазышты

Turmush — Москва районунда журналисттер менен касапкананын кызматкерлеринин ортосунда чыккан чыр иликтенип жатат. Бул тууралуу бүгүн, 2-апрелде Чүй ОИИБден кабарлашты.

Маалыматка караганда, 1-апрелде милицияга журналисттер менен касапканалардын биринин кызматкерлери урушуп жаткандыгы жөнүндө маалымат түшкөн. Ал жерге барып, аталган факт каттоого алынган. Милиция келгенден кийин жалпыга маалымдоо каражаттарынын 3 өкүлү арыз жазган. Арызда касапкананын ээси алардын видеокамерасы менен флеш-картасын тартып алгандыгы айтылган.

Ошондой эле арыз менен касапкананын ээси да кайрылган. Ал касапкананы мыйзамсыз видеого тартып жаткан журналисттерге карата чара көрүүнү суранган.

Учурда милиция иликтөө иштерин жүргүзүп жатат.