Turmush — Аңчылыкка чыккан мергенчилер табигый капканга түшүп калган кушту куткарып калышты.

Учуп бараткан кичинекей чымчыктын жүндөрү уйгактын тикенектерине илинип калган.

«Мындай табигый капкандарга майда канаттуулар көп түшүшөт. Канаттуу өзү туткундан кутула албайт. Акыры ал жырткычтарга оңой олжо болуп калат», – дешти алар.

Уйгак — өсүмдүктөрдүн татаал гүлдүүлөр тукумундагы уруусу. Эки жылдык, бийиктиги 1-1,5 метрге жетет.

Жер жүзүндө 11ден ашык түрү отоо чөп катары кеңири таралган. Кыргызстанда 2 түрү кездешет. Алар өрөөндөн тартып бөксө тоолорго чейинки нымдуу жерлерде өсөт.

Илгертеден эл арасында дары өсүмдүк катары пайдаланылган. Анын тамырындагы инулин, шекер, учуучу майлар көп дарыларга кошулат да, муун, тери жана башка ооруларды айыктырат.