Лейлектен келе жатып Тажикстанга кирип кеткен 2 жаран кайтарылды

Turmush — 21-мартта Лейлектен Бишкекке келе жатып Тажикстандын чек арасына кирип кеткен 2 жаран кайтарылды. Бул тууралуу өздүк булактар билдиришти.

Маалыматка караганда, ал күнү чек арачыларга Төрт-Көчө тилкесинде Тажикстандын Чарку айылын көздөй Кыргызстандын 2 жараны кирип кетип, тажик тараптын күч түзүмдөрү тарабынан кармалганы жөнүндө маалымат түшкөн. Эки тараптын чек арачылары Көк-Терек аймагында жолугуп, тажик тарап саат 15:15 чамасында Кыргызстандын 2 жаранын жана оор жүк ташуучу «ДАФ-ТЕ 47 ХС» үлгүсүндөгү унааны (башы гана) өткөрүп берди. Өткөрүү учурунда 2 жаран тажик тарапка эч кандай арыз-доосу жоктугун билдиришти. Алар Кочкор районунун 1986-жылы туулган тургуну У.Т. менен Кочкор районунун 1992-жылы туулган тургуну К.Т. болуп чыкты.

Алар Лейлек районунан Бишкек шаарына бара жатканда навигатор ошол багытты көрсөтүп, байкабастан Тажикстанга кирип кеткенин түшүндүрүшкөн.