Turmush — Нарын облусунун Кочкор районунда үй-бүлөлүк зордук-зомбулукту алдын алуу максатында адистер үймө-үй кыдырып жатышат. Бул тууралуу аймактык кабарчы билдирди.

Кочкор району боюнча, ички мигранттардын саны 477 болсо, алардын үй-бүлөлөрүндө 528 бала тарбияланат. Ал эми тышкы мигранттардын саны 331 болсо, алардын үй-бүлөлөрүндө 442 бала бар.

Кочкор районунун акиминин орун басары Чынара Табалдиева, райондук ички иштер бөлүмүнүн кызматкерлери, мектептердин социалдык педагогдору, социалдык өнүктүрүү башкармалыгынын кызматкерлери менен биргеликте үймө-үй кыдырышты. Кыдыруунун негизги максаты — үй-бүлөлүк зордук-зомбулукка жана турмуштун оор кырдаалына кабылган балдарды, мектепке тартылбай калган өспүрүмдөрдү аныктоо, ата-энеси миграцияда жүргөн, аз камсыз болгон үй-бүлөлөр жөнүндө маалымат чогултуу, мүмкүнчүлүгү чектелген жарандардын жашоо-шартына анализ жүргүзүү. Ошондой эле башка аймактардан келип, убактылуу жашап жаткан жарандарды аныктоо, тазалыгын сактоо боюнча түшүндүрүү иштери да жүргүзүлөт.