Караколдогу текшерүүдөн кийин кафе жана дүкөн жабылды

Turmush — Ысык-Көл облусунун Каракол шаарында санитардык нормаларды жана эрежелерди бузгандыгы үчүн «Боорсок» кафесинин жана «Золотой теленок» дүкөнүнүн иши токтотулду. Бул тууралуу Каракол райондор аралык ооруларды алдын алуу жана санитардык-эпидемиологиялык көзөмөлдөө борборунан билдиришти.

Маалыматка караганда, борбордун кызматкерлери тарабынан 2024-жылдын 1-12-июль күндөрү Каракол шаары боюнча 17 объект (тамак-аш жайлары, соода сатык түйүндөрү) текшерилди. Текшерүү учурунда соода түйүндөрүндөгү продукцияларда Бажы бирлигинин техникалык регламентинин талаптары аткарылбай, таңгагы жок, сактоо мөөнөтү өтүп кеткен азык-түлүктөр сатылганы аныкталды.

Жыйынтыгында санитардык нормаларды жана эрежелерди бузгандыгы үчүн жооптуу адамдарга Укук бузуулар кодексине ылайык жалпы 110 000 сом өлчөмүндө айып салынып, 11 санитардык көрсөтмө даярдалып берилип, 2 объектинин — «Боорсок» кафесинин жана «Золотой теленок» дүкөнүнүн иши убактылуу токтотулду.

Текшерүү президенттин 2024-жылдын 14-мартындагы «Кыргыз Республикасынын президентинин 2024-жылдагы 9-январындагы «Ишкерлик субъекттерине текшерүүлөрдү жүргүзүүгө убактылуу тыюу салуу (мораторий) жөнүндө» жарлыгына өзгөртүүлөрдү киргизүү тууралуу» жарлыгына ылайык, азык-түлүк коопсуздугу чөйрөсүндөгү мыйзамдардын сакталышын текшерүүгө уруксат берилгендигине байланыштуу жүргүзүлдү.