Turmush — Ош облусунун Кара-Суу районунда мурунку кайын эжесинин өлүмүнө шектелген жаран камакта калтырылды. Бул тууралуу Turmush басылмасына Ош облустук ички иштер башкармалыгынын басма сөз кызматы билдирди.

Маалыматка караганда, 1-июнь күнү Кара-Суу райондук соту шектүү А.М.нын баш короо чарасын карап, 2024-жылдын 30-июлуна чейин тергөө абагында камакта калтырды.

Буга чейин Turmush Кара-Суу районундагы аялдын өлүмүнө шектелип анын мурунку күйөө баласы кармалганын жазган.

Милициянын маалыматына караганда, эки тараптын ортосундагы чыр-чатак буга чейин ажырашкан түгөйлөрдүн ортосундагы бала талашуудан улам келип чыккан.

2024-жылдын 30-май күнү Кара-Суу райондук ички иштер бөлүмүнө Б.Т., Б.М. жана К.М. аттуу жарандар белгисиз учтуу буюмдан жараат алып кайрылгандыгы тууралуу кабар түшкөн. Тергөөгө чейин текшерүүнүн жүрүшүндө 30-май күнү Кара-Суу районунун аймагында 1996-жылы туулган А.М.нын үйүнѳ мурунку кайненеси — 1979-жылы туулган Б.Т., анын сиӊдиси — 1980-жылы туулган К.М., Б.Т.нын 2000-жылы туулган уулу Б.М. бастырып киришкени аныкталган. Алар балдарды талашып урушуп кетишкен.

Анын кесепетинен Б.Т., Б.М., К.М. денесинен жаракат алып, ооруканага кайрылышкан. 1980-жылы туулган К.М. денесинен алган оор жараатынан улам оорукананын жандандыруу бѳлүмүндѳ каза болгон.

Топтолгон материалдын негизинде Кылмыш-жаза кодексинин 130-беренеси (ден соолукка оор залал келтирүү) менен кылмыш иши козголуп, кылмышка шектүү катары 1996-жылы туулган А.М. камакка алынды. Окуя болгон жерден алынган далил буюмдарга, жабырлануучуларга жана шектүүгө тийиштүү экспертизалар дайындалды.

Учурда күбөлөр суралып, ыкчам тергөө амалдары уланууда.