Turmush — Кечээ, 5-июнда Ош облусунун Кара-Суу районунун аймагында «Тилемчи» рейддик иш-чарасы өттү. Бул тууралуу Ош ОИИБдин басма сөз кызматы билдирди.

Иш-чарага жергиликтүү бийлик өкүлдөрү, коомдук алдын алуу борборлорунун мүчөлөрү, социалдык жактан коргоо кызматтары, үй-бүлөнү жана балдарды коргоо мекемесинин жана аймактык билим берүү тармагынын кызматкерлери катышты. Алар тилемчилик менен алектенген жарандарды аныктап, өздүгүн тактады.

«Акыркы учурларда Кара-Суу районундагы «Туратали» базарында кайыр сурагандар көбөйүп, соодагерлерге жана базарга келген сатып алуучуларга ыңгайсыздык жараткан учурлар көп каттала баштаган. Иш-чаранын максаты тилемчиликти өнөкөт адат катары өздөштүрүп алган жарандарды, анын ичинде жаш өспүрүмдөрдү аныктоо, алардын бул аркетке баруусуна түрткү болгон себептерди жоюу болуп саналат», — деп айтылат маалыматта.

Рейддин жүрүшүндө тилемчилик менен алектенген 38 жаран райондук ички иштер бөлүмүнө жеткирилди. Алардын ичинен 22 жаш өспүрүмдүн ата-энелерине Укук бузуулар кодексинин 74-беренесинин (балдардын ден соолугуна, алардын дене бой, интеллектуалдык, психикалык, руханий жана адеп-ахлактык өнүгүүсүнө зыян келтирүүнүн алдын алуу боюнча чаралар жөнүндө мыйзамдардын талаптарын бузуу) негизинде административдик протоколдор түзүлүп, 22 000 сом айып салынды.