Turmush — Кечээ, 30-июнда Кара-Кулжа районундагы селден каза болгон 4 тургундун сөөгү жерге берилди. Бул тууралуу жергиликтүү тургундар билдиришти.

Маалыматка караганда, Ош облусунун жетекчиси Элчибек Жантаев маркумдардын жакын туугандары менен жолугуп, материалдык колдоо көрсөтүп, ар тараптуу жардам болорун билдирди.

• Буга чейин Turmush басылмасы 30-июнь күнү саат 22:25 чамасында Кара-Кулжа районунун Жетим-Дѳбѳ айылында сел жүрүп, унаада бара жаткан милиционер жубайы экөө жана 2 баласы каза болуп, 8 жаштагы кызы куткарылганын жазган.

Ош ОИИБдин басма сөз кызматы билдиргендей, бул факт каттоого алынып, окуя болгон жерге Кара-Кулжа РИИБдин тергөө тобу барып, текшерүү иштери башталган. Анын жүрүшүндө Кара-Кулжа районунун 1988-жылы туулган тургуну А.Р. 1990-жылы туулган жубайы Ж. кызы А., уулдары — 2012-жылы туулган Р. уулу Р., 2020-жылы туулган Р. уулу Н. жана 2016-жылы туулган кызы Р. кызы А. менен «Дэу Матиз» үлгүсүндөгү унаасында бара жатканда сел агызып кеткени такталган.

Жубайлардын аман калган 8 жаштагы кызы Кара-Кулжа райондук ооруканасына жеткирилип, медициналык жардам көрсөтүлгөн.

• Маркум А.Р. ИИМдин күзѳт кызматынын кызматкери болгон.