Turmush — Жеке менчик кооперативинин карамагында турган, бузулган суу мотору Чүй облусунун Кайыңды шаарынын мэриясына өткөн соң, калыбына келтирилип, 2 көчөнүн эли толук кандуу таза суу менен камсыздалды. Бул тууралуу шаар мэри Эрнур Жумабаев билдирди.

Маалым болгондой, шаарда 64 көчө бар. Анын ичинен 14 көчөсүнүн элин «Комфорт-Каинда» турак жай эксплуатациялоо кооперативи таза суу менен камсыздап келген.

«Кайыңды шаарынын 14 көчөсүнүн элин таза суу менен камсыз кылуучу суу мотору союз учурунан бери «Комфорт-Каинда» турак жай эксплуатациялоо кооперативинин карамагында турган. Ошондуктан, бузулган суу моторун оңдоо аталган кооперативдин милдетине кирген. Бирок, ар түрдүү көйгөй жаралган соң, мыйзам чегиндеги иш-аракеттер менен аны толук түрдө шаардын балансына өткөрүп алдык. Бул аралыкка чейин 2 көчөнүн элине атайын унаа менен таза суу жеткирилип турду. Жоопкерчиликти моюнга алып, суук күндөргө карабай, моторду тез арада оңдоо жумушунда өзүм башында турдум. Ыкчам аракеттин натыйжасында көйгөй чечилип, суусуз калган 2 көчөнүн эли толук кандуу таза суу менен камсыздалды. Эми мындан ары элди таза суу менен камсыздоо мэриянын көзөмөлүндө болот», — деди шаар мэри.

Буга чейин Кайыңды шаарындагы 2 көчөнүн эли 20 күндөн бери суусуз жашап жатканын аймактык кабарчыга тургундар билдиришкен.

Ал эми Кайыңды шаарынын мэри Эрнур Жумабаев суу кудукту жеке менчиктен мэриянын балансына өткөрүү иштери жүрүп жатканын айткан.