Качып кеткен «Лексустун» айдоочусу кармалды (сүрөт)

Turmush — Кечээ, 29-сентябрда Кадамжай районунун Миң-Чынар айылындагы унаа кырсыкка шектелген айдоочу кармалды. Бул тууралуу Баткен ОИИБден кабарлашты.

Маалыматка караганда, Ош—Баткен—Раззаков унаа жолунун 182-чакырымында Кадамжай районунун тургуну Б.Б «Мерседес-Бенц Е Class 260» үлгүсүндөгү унаасы менен чыгыштан батышты карай унаасын башкарып бара жатып, карама-каршы тилкеге чыгып, астында бир багытта бара жаткан «Лексус 570» үлгүсүндөгү унаадан ашып өтүүгө аракет кылган. Ошол учурда «Лексус 570» унаасынын айдоочусу анын унаасынын капталын сүзгөн. «Мерседес-Бенц» жолдон чыгып ала салып кеткен.

Бирок «Лексус-570» унаасынын айдоочусу белгисиз тарапка качып кеткен. Ал Жол кыймылынын коопсуздугун камсыздоо бөлүмүнүн кызматкерлери тарабынан табылып унаасы айып короого киргизилип, тергөө кызматына өткөрүлүп берилди.

Окуя тууралуу:

Буга чейин күбөлөр Кадамжай районунун Миң-Чынар айылында «Мерседес Бенц» үлгүсүндөгү унаа оодаралып кеткенин кабарлашкан. Анда «Лексус» үлгүсүндөгү жол тандабас менен «Мерседес-Бенц» үлгүсүндөгү унаа жол талашып айдаганы айтылган. Анын кесепетинен «Мерседес» унаасы башкаруусун жоготуп, жолдон чыгып, оодарылып кеткен.

«Мерседес-Бенц» унаасына видеорегистратор орнотулган. Ага «Лексус» унаасы «Мерседестен» озуп өткөнү тартылып калган. Ал эми «Мерседес» унаасы жолдон чыгып, ала салып кеткен. Кырсыктан оор жаракат алгандар жок. Бирок «Мерседес» унаасы зыянга учураган.