Чаткалдын Ак-Таш айылында айыл чарба жармаңкеси өтүп, азык-түлүктөр базар баасынан арзан сатылды

Turmush — Чаткал районунун эң алыскы шарты катаал болгон Ак-Таш айылында көчмө айыл чарба жармаңкеси өттү, деп билдирет аймактык кабарчы.

Маалыматка караганда, көчмө жармаңкеге президенттин Жалал-Абад облусундагы ыйгарым укуктуу өкүлү Тилек Текебаев баштаган бийлик өкүлдөрү катышты. Облус башчысы айыл аралаган көчмө азык-түлүк жармаңкесинин артыкчылыктарын белгилеп, бул аракетти башка аймактарда да уюштуруу зарылдыгын кошумчалады.

Анда эттин 1 килограммы 490 сомдон, калган негизги азык-түлүктөр базар баасынан 15-20 сомго чейин арзан сатылды.

Район-шаарларда жума сайын азык-түлүк жармаңкеси уюштурулууда. Анын негизги максаты — жарандарга ыңгайлуулук жаратуу менен баанын туруктуу сакталышын көзөмөлдөө.

Ал эми Ак-Таш айылы облус борборунан 329, район борборунан 44 чакырым алыстыкта жайгашкан. Кыш мезгили 6 айга чейин созулат. Анда 278 кожолук,1451 калк жашайт.

Дал ушул айыл тарапта кышкы туризмди өнүктүрүү үчүн тоо лыжасын түзүү боюнча аракеттер көрүлүп, инвесторлор менен сүйлөшүулөр жүрүп жатат.