Turmush — Бүгүн, 25-март күнү, Көк-Мойнок-2 айылындагы ачык аянтта экинчи жолу тутанган өрт саат 15:11де чектөөгө алынып, 17:05те толугу менен өчүрүлдү. Бул тууралуу ӨКМдин басма сөз кызматынан билдиришти.

Маалыматка караганда, өрт 4 тилкеде чыгып, жалпы 1 гектардан ашык аянтты каптаган.

Учурда жеринде түнү менен өрт кырсыгын алдын алуу жана кайра келип чыгуусуна жол бербөө максатында 3 күжүрмөн эсеп менен өрт өчүрүүчүлөр нөөмөттө турушат.

Ысык-Көл облусунун Тоң районуна караштуу Көк-Мойнок-2 айылында бүгүн саат 11:20 чамасында кайрадан өрт чыгып, өрттү өчүрүүгө Балыкчы шаардык №19 ӨКБдан 3 күжүрмөн эсеп, Ысык-Көл райондук №32 ӨКБдан 1, Тоң райондук №38 ӨКБдан 1, жалпы 5 күжүрмөн эсеп жана 44 куткаруучу тартылган.

Ошондой эле аймактагы өрт кырсыгын көзөмөлдөө максатында ӨКМге караштуу кризистик кырдаалдарда башкаруу борборунун ыкчам тобу атайын унаа менен иш алып барды. Мындан сырткары 3 авариялык куткаруу унаасы, 3 мотопомпа, токой чарбасынан 30 кызматкер, жергиликтүү тургундардан 33 адам, Тоң райондук РИИБден 22 кызматкер, Коргоо министирлигинин аскер бөлүгүнөн 38 аскер кызматкери жалпы 140 адам өрттү өчүрүүгө көмөк көрсөтүштү.

Кечээ, 24-мартта айылдагы ачык аянттын ар кайсы тилкесинде өрт чыгып, кечки саат 21:30да толугу менен өчүрүлгөн. Тилсиз жоонун жалпы аянты 5 гектарга жетип, 2 сарай жана 1 үйдүн дубалы күйгөн. Бактыга жараша, адам өмүрүнө коркунуч жаралган эмес.