Turmush — Нарын облусунун Кочкор районундагы 3 адамдын өмүрүн алган жол-транспорт кырсыгы боюнча териштирүү иштери жүрүп жатат.
Алдын ала маалымат боюнча, 2024-жылдын 13-июль күнү саат 14:30 чамасында Кочкор РИИБдин нөөмөт бөлүмүнө ушул эле күнү саат 14:15 чамасында Бишкек—Нарын—Торугарт унаа жолунан Долон ашуусу жакта №511 каттамдагы кичи автобус жол жээкке чыгып, ала салып кеткени билдирилген.
13-июль күнү 2024-жылы саат 10:00 чамасында жоопкерчилиги чектелген коому менен келишимдин негизинде жүргүнчү ташып иштеген №511 Бишкек—Баетов каттамындагы «Мерседес Бенц Спринтер 316» автоунаасын Ак-Талаа районунун Жаңы-Тилек айылынын тургуну — 1994-жылы туулган Ж.уулу К. Бишкек шаарынан башкарып чыккан. Ак-Талаа районунун Баетов айылына келе жатып, Бишкек—Нарын—Торугарт унаа жолунун 281-чакырымынан белгисиз себептерден рулга ээ боло албай, жолдун оң тарабына чыгып, автоунаа ала салып кетип, кырсыкка учураган.
Анын кесепетинен автоунаада жүргүнчү катары келе жаткан 3 адам окуя болгон жерден көз жумган. Ошондой эле жаракат алган адамдар дагы бар.
Аталган факт Кочкор РИИБге катталып, тергөө кызматы тарабынан териштирүү иштери жүргүзүлүүдө.
Буга чейин Тurmush Кочкор районунун Сары-Булак айылындагы жол кырсыктан 3 адам каза болуп, 14 адам жаракат алганын жазган.
Кырсыктан кийин Нарын облустук бириктирилген ооруканасына 10 адам жеткирилди. Алардын ичинен алтоо ооруканага жаткырылды, алардын экөө жандандыруу бөлүмүндө, абалы оор деп бааланууда. Ал эми 4 адам амбулатордук дарыланууга жөнөтүлдү.
Жол кырсыктан жаракат алгандар:
1. 1959-жылы туулган К.Ж.Т. (аял киши), ал башынан, денесинен жаракат алган. Жандандыруу бөлүмүнө жаткырылды, абалы туруктуу оор.
2. 1984-жылы туулган А.к.Н. (аял киши), ал башынан, денесинен жаракат алган.
3. 1970-жылы туулган Р.Т. (аял киши), ал башынан жаракат алган. Травматология бөлүмүнө жаткырылды, абалы туруктуу.
4. 1993-жылы туулган Б.Н. (аял киши), ал башынан, денесинен жаракат алган. Травматология бөлүмүнө жаткырылды, абалы туруктуу.
5. 2004-жылы туулган М.А. (кыз бала), башынан, денесинен жаракат алган. Травматология бөлүмүнө жаткырылды, абалы туруктуу.
6. 2019-жылы туулган М.Р. (кыз бала), башынан оор жаракат алган, балдардын жандандыруу бөлүмүнө жаткырылды. Абалы туруктуу оор.
Ошондой эле аталган кырсыктан жабыркаган 4 адам Кочкор райондук дарыгерлердин жалпы практикалоо борборуна жеткирилген. Алардын экөө жандандыруу бөлүмүнө, экөө хирургия бөлүмүнө жаткырылды. Ал эми каза болгон 3 адамдын сөөгү өлүк сактоочу жайга жеткирилди. Маркумдардын аты-жөнү такталып жатат.
Жаракат алгандар:
1. 1950-жылы туулган Ж.Б. (аял киши), башынан, денесинен жаракат алган. Жандандыруу бөлүмүнө жаткырылды.
2. 1962-жылы туулган Ж.С. (эркек киши), башынан, денесинен жаракат алган. Жандандыруу бөлүмүнө жаткырылды.
3. 2004-жылы туулган Ш.у.Н. (эркек бала), башынан, денесинен жаракат алган. Хирургия бөлүмүнө жаткырылды.
4. Ж.у.Н., башынан жаракат алган. Хирургия бөлүмүнө жаткырылды.
Оор абалдагы бейтаптарга санавиация аркылуу нейротравматолог чакырылды.
Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
