Turmush — Ноокат районунун селден жабыркаган тургундарына Баткен облусунун тургундарынан жардам жеткирилди. Бул тууралуу облус жетекчилигинен кабарлашты.

Маалыматка караганда, жардам катары азык-түлүк, өздүк гигиена каражаттары, турмуш тиричиликке керектүү жана өзгөчө кырдаалдардан кийинки калыбына келтирүү мезгилинде зарыл болгон буюмдар жеткирилди. Жөнөтүлгөн жардам Ноокат районундагы атайын штабка тапшырылды.

Буга чейин Абшыр-Ата аймагында сел жүрүп, 125 үйгө зыян келтирилгени кабарланган. Анын ичинен 25 үйдүн короосуна жана жер төлөсүнө суу кирген. Тазалоо иштерине ӨКМден техникалар, жүздөгөн адамдар тартылган. 3 үй авариялык абалда турганы айтылган.

ӨКМ бүгүн, 2-июлда Ноокат районунда сел суусу кирген жалпы 28 үй сел калдыктарынан толугу менен тазаланып бүткөнүн маалымдады.

Маалыматка караганда, райондун Кулатов айыл аймагынын Абшыр-Ата айылында ӨКМдин 9 техникасы, Исанов айыл аймагынын Тескей-Кожоке айылында 3 техника, Көк-Жар айыл аймагынын Ак-Өтөк айылында 2 техника иштеп, сел калдыктарынан тазалоо жана калыбына келтирүү жумуштарын жүргүзүлүүдө.

Мындан сырткары №37 жол тейлөө ишканасынын 4 техникасы менен жолдорду калыбына келтирүү жумушу жүрүүдө.