Ак-Талаада окуучулар арасында интеллектуалдык сынак өттү

Turmush — Нарын облусунун Ак-Талаа районунда окуучулар арасында «Билим кубогу» аталышындагы интеллектуалдык сынак уюштурулду. Бул тууралуу аймактык кабарчы билдирди.

Маалым болгондой, ак-талаалык жаш активисттер Бактияр Качыбеков менен Карлыгач Эсенбекова тарабынан кыргыз тилин өнүктүрүү, жаштардын билим деңгээлин жогорулатуу жана окууга болгон кызыгуусун арттыруу максатында сынак уюштурушкан.

Сынактын 1-туру Коңорчок айылынын Насипа Жыргалбекова атындагы орто мектебинде, Тоголок Молдо айылынын Жоробек Сатылганов атындагы орто мектебинде жана Баетов айылынын Эсенгул Карасартов атындагы орто мектебинде өткөрүлүп, финалга 6 команда жолдомо алды. Финалдык туру ушул жылдын 1-ноябрь күнү өткөрүлөт.

Финалга өткөн командалар:

— Жерге-Тал айылынын Итукул Молдобаев атындагы орто мектебинин «Ак ниет» командасы;

— Кара-Бүргөн айылындагы Мукаш Базаркулов атындагы орто мектебинин «Акыл башаты» командасы;

— Баетов айылындагы Эсенгул Карасартов атындагы орто мектебинин «Келечек» командасы;

— Терек айылындагы Калый Молдобасанов атындагы мектебинин «Мыктылар» командасы;

— Кызыл-Белес айылындагы Сүйүнбек Атамбеков атындагы орто мектебинин «Билим KG» командасы;

— Тоголок Молдо айылынын Жоробек Сатылганов атындагы орто мектебинин «Интеллект» командасы өттү.

Жеңген командаларга демөөрчүлөр тарабынан акчалай сыйлыктар жана баалуу белектер тапшырылат.