Turmush — 27-майда Ак-Талаа районунда коомдук ишмер Мырзабек Черикбаев көз жумду. Бул тууралуу жергиликтүү тургундар билдиришти.

Маалыматка караганда, ал 70 жашта болчу. Маркум 28-май күнү Ак-Талаа районунун Баетов айылында жерге берилди.

С.Черикбаев 1980-1990-жылдары Ак-Талаа районуна жана Баетов айылына көрктөндүрүү, социалдык объектилерди куруу, айылдын инфраструктураларын оңдоого салым кошкон.

Өмүр баяны:

Черикбаев Мырзабек Мокеевич 1954-жылы Нарын шаарында туулган. 1961-жылы Нарын шаарындагы Токтогул атындагы орто мектебинде, 1971-жылы Ак-Талаа районунда В.Ломоносов (азыркы Шүкүрбек Бейшеналиев) атындагы орто мектебинде билим алган. 1973-1975-жылдары Советтик армиянын катарында кызмат өтөгөн. 1978-1982-жылдары Фрунзе шаарындагы политехникалык институтунда окуган. 1982-1983-жылдары айыл чарба химия бирикмесинде башкы инженер, 1983-1988-жылдары Ак-Талаа райондук колхоздор аралык курулуш уюмунда башкы механик, 1988-1998 жылдары Ак-Талаа райондук мунайзат ишканасында директор болуп эмгектенген.