Ак-Талаада акыркы 6 айдын ичинде бруцеллездун 16 учуру катталганы айтылды

Turmush — Нарын облусунун Ак-Талаа районунда 2024-жылдын 6 айында бруцеллездун 16 учуру катталган. Бул тууралуу кечээ, 11-июль күнү өткөн өзгөчө коркунучтуу жугуштуу оорулар боюнча кеңешмеде белгилүү болду.

Ак-Талаа райондор аралык ооруларды алдын алуу жана мамлекеттик санитардык-эпидемиологиялык көзөмөлдөө борборунун жетекчиси Эрлан Бекишовдун айтымында, бруцеллездун 12 учуру эркектерде, 4 учуру аялдарда катталган.

Алардын арасында 14 жашка чейинки балдар дагы бар. Оорунун 4 учуру ири мүйүздүү малдан жукканы аныкталган, калганы белгисиз. Илдет былтыркы жылдын 6 айына салыштырмалуу 10 учурга өскөндүгү айтылды. Айыл өкмөттөр боюнча бруцеллездун курч кармаган түрү төмөнкү аймактарда жогорку көрсөткүчтө турат.

— Баетов айыл аймагында — 3 учур;

— Чолок-Кайың айыл аймагында — 4 учур;

— Кош-Дөбө айыл аймагында — 3 учур.

Координациялык кеңешке катышкан айылдык ден соолук комитеттеринин, фельдшердик-акушердик пункттардын жана айыл өкмөттөрдүн социалдык кызматкерлери оорунун көбөйүшүнө ветеринардык кызматтын начардыгы себеп болуп жатканын айтышты.

Буга жооп катары Ак-Талаа райондук ветеринардык жана фитосанитардык коопсуздук боюнча башкармалыгынын улук инспектору Келгеналы кызы Атыркүл айылдарда мал ооруларын алдын алуу боюнча түшүндүрүү иштери байма-бай жүргүзүлүп жатканын, бирок мал ээлери санитардык эрежелерди сактабастан кайдыгерлик кылып жатышканын белгиледи.