Turmush — Ак-Суу районундагы Арашан эс алуу жайынан Ала-Көл көлүнө барчу жолдогу көпүрө оңдолууда, деп билдирет аймактык кабарчы.

Маалыматка караганда, көпүрөнү оңдоо үчүн Кыдыр Аке айыл аймагынын бюджетинен 163 миң сом каралган.

«Райондо эң көп туристтер каттаган аймак — бул Арашан эс алуу жайы. Келген чет элдик туристер Ала-Көлдү да көрүп кайтышат. Эс алуучулардын коопсуздугу үчүн жолдогу көпүрөнү жасоого, тактап айтканда темир жана курулуш материалдары үчүн каражат бөлдүк. Ал жерде жайгашкан 8 эс алуу жайынын ээлери көпүрөнү жасатуу ишин колго алышты», — дейт Кыдыр Аке айыл аймагынын башчысы Талант Көбөнбаев.

Ала-Көл Тескей Ала-Тоонун тоо кыркаларынын арасында, деңиз деңгээлинен 3532 метр бийиктикте жайгашкан.

Мөңгү суусунан жаралган көлдүн тереңдиги 70 метрден ашат. Көл шамалга, күн нуруна жана аба ырайына жараша өңүн өзгөртүп, кулпуруп турат.