Turmush — Ак-Башат айыл аймагындагы арканын ачылышына карата уюштурулган тоскоолдуктар жарышында Жайыл районунун Арал айылынан эгиз бир туугандар жеңишке жетишти.

16-сентябрда Чүй облусунун Жайыл районунун Ак-Башат айыл аймагында жергиликтүү жаштардын каражатына курулган арканын расмий ачылышы өттү.

Turmush басылмасынын кабарчысы билдиргендей, арканын долбоорун төрт архитектор — Ак-Башат айыл аймагынын айылдарынын тургундары жасаган.

Салтанаттуу бөлүктөн кийин тоскоолдуктар жарышы өттү.

Мындай мелдеш бул жерде биринчи жолу өткөрүлдү. Марафонго 70тен ашык спорт сүйүүчүлөрү катышты.

Марафондун катышуучулары аска-зоо, көлчүк жана башка түрүндөгү табигый тоскоолдуктарга туш болушту. Жарыш аралыгы 5 чакырымды түздү.

«Жаштарды спортко тартуу, сергек жашоого үндөө, таза абада майрамдоо — спорттук мелдештин негизги мотиви», — дейт Ак-Башат айылдык кеңешинин депутаты Жоомарт Мырзахматов.

Жарыштын жеңүүчүлөрү Арал айылынан 2005-жылы туулган тургундар — эгиздер Эльдар жана Эльзар Сагыналиевдер болду. Алар биринчи жана экинчи орунду ээлешти. Алардын ар бири сыйлык катары телевизор алышты.

Алар 5 чакырым аралыкты 30 жана 35 мүнөттө басып өтүштү.

Экөө тең спорт менен машыгышат. Эльдар жеңил атлетика, Эльзар күрөш менен алектенет. Алар мектепти жакында бүтүп, атасынын бизнесине жардам берип жатышат.