Turmush — Өзгөн районунун Кызыл-Октябрь айыл аймагынын 12 жаштагы туругунун өлүмүнөн кийин 2 адам кармалды. Бул тууралуу Turmush басылмасына Ош облустук ички иштер башкармалыгынын басма сөз кызматы билдирди.

Маалыматка караганда, 2024-жылдын 25-майында ϴзгөн райондук ички иштер бөлүмүнө Кызыл-Октябрь айыл аймагынын Б.А. аттуу тургуну (жаш өспүрүм) үйүнүн короосундагы сарайында өзүн-өзү асып каза болгондугу тууралуу маалымат келип түшкөн.

«Текшерүүнүн жүрүшүндө соттук-медициналык экспертиза дайындалып, Кылмыш-жаза кодексинин 128-беренеси (өзүн-өзү өлтүрүүгө жеткирүү) менен кылмыш иши козголгон. 2024-жылдын 30-майында бул кылмышка шектүү катары ϴзгөн районунун Р.С. жана Ж.Т. аттуу тургундары кармалды.

Алардын берген көрсөтмөлөрү күмөн жараткандыктан, аныктоо максатында соттук психолого-психиатриялык экспертизалар дайындалган. Ош облустук психитария жана наркология борбору берген маалыматына ылайык, Р.С. жана Ж.Т. аттуу жарандар психикалык ооруларынан улам психиатр дарыгердин каттоосунда турган. Учурда тергөө амалдары уланып жатат», — деп айтылат маалыматта.

Буга чейин Turmush Өзгөн районунда 12 жаштагы окуучу асынган абалда табылганын жазган.

Алдын ала маалымат боюнча, 2012-жылы туулган бала таенесинин үйүнүн короосунан асынган абалда табылган.

Кийинчерээк милиция иликтөө иштери башталып, тиешелңң экспертиза дайындалып, күбөлөр суралып жатканын билдирген.