Turmush — Израилден келген туристтер «Тойота Секвойя» үлгүсүндөгү унаасын ижарага алышып, Кемин өрөөнүндөгү таштак жолго айдап кетишкен. Бул унаанын ээсине жакпай, жаңжал чыккан.
Унаалардын ээсинин айтымында, 2024-жылдын 17-июлунда Израилден келген туристтерге 3 «Тойота Секвойя» жол тандабас унаасын ижарага берген.
Унаалар техникалык жактан жакшы абалда болгон. Туристтер менен бара турчу багыты да талкууланган. Ижарачыга Кел-Суудагы боз үй лагерине гана барууга боло тургандыгы алдын ала эскертилген.
Туристтер 20-июль күнү телефон чалып, унаалардын бири жүрбөй калганын билдиришкен. Унаа ээси механик менен жаңы стартер (моторлорду механикалык жол менен жүргүзүүчү прибор) сатып алышып, Кел-Сууга барышкан. Бул учурда туристтер калган эки унаа менен Нарын шаарындагы мейманканага жөнөшкөн.
Унаа ээси менен механик келгенден кийин унааны начар абалда таап, мамлекеттик номурлары жок болуп калганын аныкташкан.
Алар унааны таштап, туристтердин мейманканасына бет алышкан. Мейманкананын унаа токтотуучу жайынан 2 унааны да начар абалда табышкан.
Унааларды текшергенде, бир унааны кире беришиндеги босоголору үзүлгөн, эки унаанын видео каттоосу алынган, фаралары сууга малынган эле.
Туристик топтун жетекчисинин айтымында, тоо аралап жүргөндө сел жүргөн, бирок экскурсиянын алдында бул унаалар менен тоодо жүрүүгө мүмкүн эместиги эскертилген. Ошентип, форс-мажордук кырдаал түзүлгөн.
Сүйлөшүүлөр учурунда туристтик топтун лидери мотор үчүн 4000 доллар төлөп берүүнү сунуштаган. Аны менен бирге Израилге кайтып келгенден кийин бул сумманы уюштурган жергиликтүү компания аркылуу өзүнө кайтарып алуу үчүн унаанын бузулгандыгы үчүн квитанция берүүнү суранган.
Ал унаа менен көлгө барчу жол менен жүрүшкөнүн айтып, ошондой эле дарыяны бойлоп жүрүү фактысын четке кагышкан. Андан кийин туристтер жолго чыгышып, унаа ээси эвакуатор чакырган. Унаа Кел-Суудан 14 сааттын ичинде алынып келинген.
Үйгө кайтып келгенден кийин унаанын ээси бузулган унаадагы видео каттоонун картасын алып чыккан (калган эки унаадагы негизги жазгычтарды туристтер өздөрү алып кетишкен, бул келишимдерди бузуу болуп саналат).
Видео каттоо жаздыруулары туристтердин дарыяларды жана таштак жерлерди бойлоп айдап баратканын көрсөткөн. Социалдык түйүндөрдө жергиликтүү гиддин видеосу да табылган — кадрларда суу үстүндө жүргөн туристтер тартылган.
Унаанын ээси унааны алууну чечкен. Алар Кемин районундагы жолдун тилкесинде жолугушкан. Ал жерде жаңжал болгон.
Ээси унааларга келтирилген зыянды эсептеген. Бул бир моторуна 3500 доллар, эвакуатордун баасы 35 миң сом, бир унаанын газ багы тешилген (зыян 5000 сом), кире бериши үзүлгөн (40 миң сом), фара жана туманга каршы жарыктар бузулган.
Буга чейин Turmush басылмасы Чүй облусунун Кемин районунда Израилден келген туристтердин катышуусунда жаңжал чыкканын жазган.
Израилден келген чет элдик жарандардын тобу Кыргызстанда жол тандабастарды ижарага алышкан. Алар менен өлкөнүн Нарын жана Ысык-Көл облустарын кыдырып чыгышкан.
Унаалардын бирине материалдык зыян келтирилип, анын кесепетинен туристтер менен унаа ээсинин ортосунда оозеки чатак чыккан. Айрым маалыматтарга караганда, «Тойота Секвойя» үлгүсүндөгү унаа сууга токтоп калган.
Чүй ОИИБдин басма сөз кызматы билдиргендей, 2024-жылдын 22-июлунда Кемин райондук ички иштер бөлүмүнүн нөөмөт бөлүмүнө Бишкек—Нарын—Торугарт жолунун 112-чакырымында бир топ эркектердин ортосунда жаңжал чыккандыгы тууралуу маалымат келип түшкөн. Окуя болгон жерге ыкчам тергөө тобу жөнөп кеткен.
Милиционерлер 2024-жылдын 15-июлунда Израилдин жараны А.Р. 2024-жылдын 15-июлунда Бишкек шаарынын тургунунан «Тойота Секвойя» үлгүсүндөгү унааны ижарага алган. Туристтер ижарага алынган унаа менен Нарын жана Ысык-Көл облустарын кыдырып, андан соң Кемин өрөөнүнө келишти. «Тойотанын» ээси GPS трекерди колдонуп, израилдик жаран унаасын аябастан, жаман жолдо айдап баратканын байкаган. Унаанын ээси унааны алуу үчүн Кемин өрөөнүнө кеткен.
Жолугушууда 1938-жылы туулган чет элдик жаран С.Ш. жаңжал салган. Ал унааны ачкычын берүүдөн баш тартып, катуу жыгылган.
Ал ооруканага жеткирилип, унаанын ээсине эч кандай доосу жок экенин билдирди.
Окуя боюнча эч кандай арыз жазылган эмес.
Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
